Sveisisku veljararnir hava sambært fyribils úrslitum vrakað eitt umstrítt uppskot um at seta mark á 10 milliónir íbúgvar. Umleið 55 prosent fara væntandi á fólkaatkvøðuni í dag at stemma ímóti uppskotinum, meðan 45 prosent fara at stuðla uppskotinum.
Uppskotið varð lagt fram av Sveisiska Fólkaflokkinum, sum leingi hevur arbeitt fyri strangari tilflyting. Eitt ja hevði samstundis kunnað sett avtaluna um frælsa flytføri millum Sveis og ES í vanda.
ES-samstarvið hevði verið í vanda
Sveis hevur í dag umleið 9,1 milliónir íbúgvar. Í 2002 vóru íbúgvarnir umleið 7,3 milliónir. Umleið 27 prosent av teimum, sum búgva í landinum, eru fødd uttanlands.
Vinnulívið ávaraði staðiliga ímóti uppskotinum. Meira enn helvtin av sveisisku útflutningssøluni fer til ES, og atgongdin til innara marknaðinum hjá ES er tengd at avtaluni um frælsa flyting av arbeiðsmegi.
Arbeiðsmegi var kjarnuspurningurin
Mótstøðufólk vístu á, at hotell, sjúkrahús og røktarheim eru treytað av uttanlandskari arbeiðsmegi. Tey løgdu eisini dent á, at ein vaksandi partur av fólkinum er eldri, og at tørvur tí er á yngri arbeiðsmegi.
Tey, sum stuðla uppskotinum, halda hinvegin uppá, at stór tilflyting leggur trýst á bústaðir, samferðslu, skúlar og almennar tænastur. Mótstøðufólk hava svarað, at hesar avbjóðingar ikki kunnu loysast við at leggja skuldina á tilflytarar.
Fyribils úrslitið bendir sostatt á, at meirilutin av sveisisku veljarunum ynskir at varðveita verandi samband við ES og tryggja atgongd til arbeiðsmegi úr øðrum londum.
