Sjómannadagurin í Klaksvík verður í morgin, men alt tað stuttliga byrjar longu í dag.

Í dag, fríggjadagin 21. august, verður nevniliga nógv lív og rørslur á Kósabrúnni og á Vágni.

Kl. 17.00 verður fiskikapping fyri øll børn á Kósabrúnni. Børnini skulu sjálvi hava tráðu og bjargingarvest við, og fyrireikararnir heita á fólk um at møta í góðari tíð.

Bæði børn og vaksin fáa kaffi, kakao og góðgæti.

Kl. 18.00 byrjar stóra vatnkríggið. Skip og bátar leggja at Kósabrúnni og taka fólk umborð, áðrenn vatnkríggið fer í gongd millum bátarnar á Vágni.

Sløkkilið og bjargingarfeløg verða eisini við.

Vatnkríggið heldur fram, til sjóverjuskipið blæsur tríggjar ferðir við skipslúðrinum sum tekin um, at kríggið er av.

Tað verður altso lagt upp til ein stuttligan seinnapart fyri bæði børn og vaksin.