Føroyska orkuskiftið stendur í stað.

Tíggju ár eftir, at málið um 100 prosent varandi elorku í 2030 varð sett, er parturin av varandi elorku framvegis 51 prosent. Tað vísir nýggja ársfrágreiðingin hjá Varandi Vinnu.

Samstundis veksur elorkutørvurin ár um ár, meðan útbyggingin av varandi orku gongur ov seint.

Ógreiðir karmar bremsa menningini

Sambært Varandi Vinnu eru tað ikki tøkniligar forðingar, sum halda orkuskiftinum aftur.

Heldur eru tað ógreiðir karmar, drúgvar arbeiðsgongdir og vantandi loyvi til nýggjar verkætlanir.

Netverkið vísir á, at hvørki vindmyllulundir, sum eru partur av útbyggingarætlanunum, ella aðrar privatar verkætlanir hava fingið neyðugu ferðina. Úrslitið er, at framleiðslan stendur í stað, hóast tørvurin á grønari elorku veksur.

Vinnan saknar greið mál

Varandi Vinna heldur eisini, at føroyskar fyritøkur mangla greið og realistisk mál at arbeiða eftir.

Fleiri fyritøkur hava sett sær mál um at minka sítt útlát. Sambært frágreiðingini hava summar tó tikið málini aftur orsakað av óvissuni á orkuøkinum.

Sev hevur víst á, at parturin av varandi elorku kann vaksa upp í umleið 70 prosent í 2030, um sólorkan verður nógv útbygd, og fýra nýggjar vindmyllulundir verða bygdar komandi árini.

Verður einki gjørt, kann parturin av varandi elorku hinvegin lækka niður um 40 prosent í 2030. Tað vísa tær metingar, sum Sev hevur lagt fram.