Á hugnaligari samkomu á Vinnuháskúlanum fingu 29 næmingar í gjár prógv. Guttormur í Skála helt røðu vegna Tórshavnar kommunu og brúkti ævintýrið hjá H.C. Andersen um silvurskillingin sum mynd.
Skillingurin fór út í heim við orðunum: “Hurra! Nu skal jeg ud i den vide verden!” Sama møguleika hava nýggju próvtakararnir nú.
Forvitni og mótstøða
Guttormur í Skála segði, at próvtøkutíðin er “spennandi, men strævin”. Hann legði dent á, at forvitni verður avgerandi í arbeiðinum framyvir.
“Hvat, hví og hvussu eru týdningarmiklastu orð tykkara framyvir,” segði hann.
Hann ávaraði eisini um, at nýggj vitan ikki altíð verður væl móttikin heima. Tí skulu próvtakararnir tora at vísa, “hvørjum tilfari tit eru gjørdir úr”.
Bárður á Lakjuni, landsstýrismaður í mentamálum, segði eisini nøkur orð. Sum vant var nógv fólk komið til próvhandanina.
