Sum vit skrivaðu í gjár kom eldur í eitt neyst á Strondum síðstu nátt.

Og í gjár fór ein brunaserfrøðingur hjá løgregluni inn á Strendur í eini roynd at fáa greiði á, hví eldur kom í.

Løgreglan sigur, at síðani hava nakrir blaðungir dreingir boðað frá, at tað eru helst teir sum hava brent neystið í grund.

Teir høvdu verið í neystinum og har høvdu teir kynt eld, men teir hildu, at teir høvdu sløkt alt aftur.

Men tá ið teir so sóu, at eldur hevði verið í neystinum, søgdu teir sjálvir foreldrunum frá, at tað helst vóru teir, sum høvdu skyldina.

Tað heldur løgreglan at teir hava rós uppiborið fyri. Men av tí, at teir eru undir 15 ár, verður ikki meiri gjørt við málið.