Nógv starvsfólk í almenna geiranum brúka longu vitlíki í gerandisdegnum. Tað upplýsir Aksel V. Johannesen, landsstýrismaður í fíggjarmálum, í svari til Steffan Klein Poulsen, løgtingsmann.

Talan er serliga um stuðuls- og hjálparamboð sum ChatGPT og Copilot. Eingin nágreinilig kanning er tó gjørd av allari nýtsluni í almenna geiranum. Smærri kanningar vísa kortini, at vitlíki longu verður brúkt nógvastaðni.

Fáir stovnar hava ment egin amboð

Hóast nógv starvsfólk brúka vitlíki, hava fáir almennir stovnar ment egin vitlíkisamboð til ítøkilig endamál.

Á sumri í fjør varð vitlíki lagt undir landsstýrismannin í fíggjarmálum. Gjaldstovan fekk síðani uppgávuna at orða eina heildarætlan, sum verður handað landsstýrismanninum í heyst.

Skal frígeva starvsfólkaorku

Eitt av málunum er, at almenni geirin skal kunna frígeva munandi starvsfólkaorku næstu árini.

Ætlanin er eisini at seta royndarverkætlanir í verk í almenna geiranum. Endamálið er at fáa vitan, royndir og læring um, hvussu tað almenna kann gagnnýta vitlíki á skynsamasta hátt.