Tvey álvarslig trygdarhol hava elvt til ótta fyri telduálopum um allan heim. Myndugleikar og stórfyritøkur hava stongt heimasíður og steðgað tænastum, eftir at veikleikarnir vórðu avdúkaðir í forritanarmálinum PHP.

Sambært BBC hava trygdarholini verið óuppdagað í meira enn tíggju ár. Tey vórðu funnin við hjálp frá framkomnum vitlíki, sum OpenAI hevur ment.

Undir ávísum umstøðum kunnu teldusníkar misnýta trygdarholini til at taka ræðið á servarum og stjala viðkvæmar upplýsingar.

Sambært KT-trygdarfyritøkuni Wiz verður PHP brúkt á umleið 70 prosentum av heimsins heimasíðum.

Almennar tænastur stongdar

Tá ávaringarnar komu 21. oktober, settu myndugleikar og stórfyritøkur kring heimin umfatandi trygdartiltøk í verk.

Wikimedia, sum stendur aftan fyri Wikipedia, bretskir myndugleikar og fleiri evropeiskir stovnar hava fyribils stongt heimasíður og tænastur.

Í Bretlandi vórðu 32 almennar heimasíður stongdar fyri at fyribyrgja møguligum telduálopum.

Í Japan hevur fjarskiftisfelagið SoftBank sambært japanskum miðlum fyribils steðgað ávaringum um jarðskjálvtar, flóðaldur og aðrar náttúruvanlukkur.

Milliónir royndir at misnýta trygdarholini

Sambært Matthew Prince, stjóra í Cloudflare, vaks talið av royndum at misnýta trygdarholini úr fleiri túsundum upp í milliónir, eftir at upplýsingarnar vórðu almannakunngjørdar.

Fríggjamorgunin vóru tó eingi váttað dømi um væleydnað telduálop.

PHP hevur nú givið út dagføringar, sum skulu bøta um veikleikarnar.

Trygdarmyndugleikar heita staðiliga á eigarar av heimasíðum um at dagføra skipanirnar beinanvegin.

Eisini heimasíður, sum brúka WordPress, kunnu vera í vanda. Tað er ikki nóg mikið at dagføra WordPress. Sjálvt PHP má eisini dagførast.