Bakkafrost Scotland hevur sjósett Dìonadair a’ Bhradain – Guardian of the Salmon, eina 18,5 metra langa tvíkilju, sum skal styrkja arbeiðið við fiskaheilsu og vælferð á skotsku vesturstrondini og oyggjunum.
Tvíkiljan er bygd í Skotlandi hjá Macduff Group Shipyards, og skal geva manningunum hjá felagnum ein støðugan og væl útgjørdan arbeiðspall til stuðulstænastur í sambandi við brunnbátar.
Nýggja tvíkiljan verður partur av flotanum hjá Bakkafrost Scotland, sum nú telur 87 før.
Meira enn 95 milliónir krónur í íløgum
Sambært Bakkafrost Scotland er sjósetingin partur av nýggjum íløgum í Macduff Shipyards fyri meira enn 95 milliónir krónur. Felagið sigur, at íløgurnar stuðla umleið 250 størvum og 40 lærlingaplássum í landnyrðingspartinum av Skotlandi.
Elleivu ára gamal gav farinum navn
Farið fekk navn frá 11 ára gamla Greg Sinclair, syni Donnie Sinclair, sum er leiðari fyri sjóvinnuvirksemið hjá felagnum. Systurfarið Bradan an Eòlais kom í flotan í fjør.
Stephen Flynn, ráðharri fyri búskapi, ferðavinnu og samferðslu, sigur, at slíkar íløgur styrkja staðbundin størv, førleikar og framtíðina hjá skotskum strandarsamfeløgum.
