Bókasøvnini hava eina størri uppgávu enn at læna bøkur út. Tey skulu tryggja, at øll hava atgongd til álítandi upplýsing, læring og mentan.

Tað var høvuðsboðskapurin, tá ið Bárður á Lakjuni, landsstýrismaður í mentamálum, vitjaði á Landsbókasavninum.

Bókasøvn verja fólkaræðið

Sambært bókasavnslógini skulu bókasøvn veita fría og ókeypis atgongd til upplýsing, lærdóm og mentan.

Annika Smith, landsbókavørður, vísti á, at bókasøvn eru meira viðkomandi enn nakrantíð, nú ófriður er nógvastaðni í heiminum, og falstíðindi eru gerandiskostur.

Bárður á Lakjuni segði, at vitjanin gav honum gott innlit í fjølbroytta arbeiðið á Landsbókasavninum og á fólka- og skúlabókasøvnum kring landið.

Savn fyri alt landið

Landsbókasavnið er tjóðbókasavn, universitetsbókasavn og høvuðsbókasavn fyri alt landið.

Savnið førir tjóðbókaskránna, veitir tænastur til granskarar, lesandi, fólkabókasøvn og almenningin og umsitur bókasavnsgjaldið til rithøvundar.

Svend Højgaard, universitetsbókavørður, lýsti Landsbókasavnið sum ein vitanarverkstað, har øll skulu kenna seg vælkomin.