Charles kongur hevur goldið 12,9 milliónir pund í skatti. Tað svarar til umleið 112 milliónir krónur og setur hann millum 100 teir størstu skattgjaldararnar í Bretlandi. Tað skrivar BBC.
Samstundis vísa nýggju roknskapirnir, at stuðulin til bretska kongshúsið fer at vaksa nógv næstu árini. Hann fer úr 51,8 milliónum pundum í 2024–2025 upp í 99,9 milliónir pund í 2027–2028. Tað svarar til eina hækking úr umleið 451 milliónum krónum upp í 869 milliónir krónur.
Stuðulin rindar fyri rakstur, starvsfólk, ferðir, móttøkur og viðlíkahald av slottum. Harumframt fær umvælingin av Buckingham Palace 34,5 milliónir pund, sum svarar til umleið 300 milliónir krónur.
Meira opinleiki, men ikki alt er greitt
Prinsur William hevur eisini upplýst, at hann rindaði 7,76 milliónir pund í skatti. Tað svarar til umleið 68 milliónir krónur.
Buckingham Palace sigur, at endamálið er at skapa størri gjøgnumskygni. Men skattaserfrøðingurin Dan Neidle heldur, at frágreiðingin framvegis er ógreið, tí hon ikki vísir, hvussu skatturin er roknaður.
