Varandi Vinna hevur tikið eitt nýtt stig. Á ársfundinum mikudagin varð samtykt at leggja netverkini Varandi Vinna og Varandi Vinna Innleiðsla saman í eitt felags netverk. Samstundis varð nýtt stýri valt.
Føroya Arbeiðsgevarafelag hevur í dag 33 fyritøkur í netverkinum. Endamálið er at styrkja arbeiðið við burðardygd og skapa betri karmar fyri føroyskt vinnulív.
Burðardygdararbeiðið savnað á einum stað
Seinastu tvey árini hevur netverkið ment seg nógv. Við samanleggingini verður arbeiðið framyvir savnað á einum stað.
Netverkið er opið fyri allar limir í Føroya Arbeiðsgevarafelag, og vónin er, at fleiri fyritøkur fara at gerast partur av arbeiðinum komandi árini.
Í nýggja stýrinum sita umboð fyri Effo, Betri Trygging, Hotel Djurhuus, Hiddenfjord, Vinnuhúsið, Articon og Elektron.
Túsundtals starvsfólk og stór umhvørvistøl
Burðardygdarfrágreiðingar eru eitt krav fyri at vera limur í netverkinum. Higartil hava 18 fyritøkur latið frágreiðing fyri 2025, sjey frágreiðingar eru á veg, og átta fyritøkur fara at gera sína fyrstu frágreiðing í 2026.
Felags ESG-tølini vísa eisini stóra virksemið í netverkinum. Limafyritøkurnar høvdu eina samlaða orkunýtslu upp á 1.575 GWt og eitt samlað CO₂-útlát í vavi 1 og 2 upp á 428.198 tons. Samlaða burturkastnøgdin var 16.817 tons.
Fyri fyrstu ferð eru eisini felags sosial lyklatøl gjørd upp. Fyritøkurnar í netverkinum hava 6.036 løntakarar, svarandi til 5.189 ársverk.
