Í eini nýggjari frágreiðing skrivar ráðið, at skipanarligir váðar hava bygt seg upp í føroysku fíggjarskipanini í longri tíð.

Føroyski búskapurin hevur verið í hákonjunkturi í nógv ár. Arbeiðsmarknaðurin er sera trongur, og húsaprísirnir hava hækkað støðugt.

Útlánini vaksa

Sambært Det Systemiske Risikoråd tók prísvøksturin á føroyska bústaðarmarknaðinum dik á seg í 2025. Samstundis vaks samlaða útlánið hjá føroysku bankunum.

Tí mælir ráðið til, at bankarnir skulu hava meiri kapital at standa ímóti við, um búskapurin brádliga vendir.

Skal verja húsarhald og vinnulív

Talan er um ein sonevndan mótsveiggjandi kapitalbuffara. Hann verður bygdur upp í góðum tíðum, so bankarnir kunnu halda fram at veita húsarhaldum og fyritøkum lán, um kreppa rakar.

Føroya Váðaráð tekur undir við metingini.

Det Systemiske Risikoråd mælir til at hækka buffaran úr einum upp í tvey prosent. Málið er, at buffarin stigvíst skal byggjast upp í 2,5 prosent.

Ráðið sigur samstundis, at buffarin kann lækkast beinanvegin, um álvarsligt trýst kemur á fíggjarskipanina, og vandi er fyri, at bankarnir herða lángevingina ov nógv.