Danmark er við í einum nýggjum NATO-keypi av upp í fimm MQ-4C Triton-dronum frá Northrop Grumman. Keypið skal styrkja fregnartænastu og eftirlit hjá verjusamgonguni - serstakliga í Norðuratlantshavi og Arktis.
Avgerðin varð kunngjørd 7. juli á NATO Summit Defence Industry Forum í Ankara í Turkalandi.
Skulu røkka langt og vera leingi á flogi
MQ-4C Triton er ment til maritimt eftirlit. Dronan kann vera á flogi í upp í 24 tímar og flúgva í meira enn 15 kilometra hædd.
Við langtrøkkandi sensorum skal hon geva NATO betri møguleikar at varnast hóttanir, verja sjóvegir og stuðla átøkum í krevjandi økjum.
Arktis og Norðuratlantshavið í miðdeplinum
Sambært NATO skal keypið nútímansgera eftirlitsførleikarnar hjá samgonguni. Serligur dentur verður lagdur á Evropa, Norðuratlantshavið, Arktis og norðaru leiðirnar.
Northrop Grumman skal framleiða flogførini, meðan Airbus Defence and Space og onnur evropisk feløg skulu standa fyri jørðskipanum, stýring, dátuhandfaring, undirstøðukervi og rakstrarstuðli.
