Leygardagin fara 300 skótar úr øllum landinum at seta sín dám á býarmyndina í Klaksvík. Skótarørslan sigur, at tá verður nevniliga árligi smáskótadagurin og hesa ferð verður hann í Klaksvík.

Smáskótadagurin savnar børn úr øllum landinum, og hann er ætlaður børnum úr 4. flokki og yngri. Børnini verða býttir í bólkar og fara at vera við í einari postarenning runt um í býnum, har tey fáa ymiskar avbjóðingar og uppgávur og tey fara eisini at spæla spøl saman.

Endamálið við smáskótadegnum er, at styrkja felagsskapin ímillum smáskótar kringa landið, og samstundis at geva teimum ein dag við spølum, avbjóðingum og felags upplivingum, sigur skótarørslan.

Endamálið er eisini at geva teimum høvi at menna førleikar og uppliva hvat tað er, at verða skóti. Tiltakið byrjar kl 10 á Vágsbøi og endar eisini á saman staði klokkan 15.30.