Seinnapartin í gjár fekk MRCC Tórshavn og Tórshavn Radio neyðarkall frá einum Íslendskum uppisjóvarskipi, um at eldur var í.

Skipið var tá statt umleið 15 sjómíl norðan fyri Føroyar. Skipið var á veg úr Føroyum til Íslands.

MRCC Tórshavn sendi beinanvegin hjálp til skipið. Brimil sum var staddur umleið tveir tímar frá skipinum, setti beinanvegin kós móti tí.

Rescue Vón av Eiði var longu úti og sigldi. Teir hoyrdu eisini neyðarkallið og settu kós móti skipinum, sum var umleið 40 minuttir burtur.

Men tað tók manningini á íslendska skipinum bara nakrar minuttir at basa eldin og tey kundu samstundis staðfesta, aat ongin hevði fingið skaða av hendingini.

Brimil skuldi sleipa skipið til Føroyar og mynduleikarnir í Íslandi eru kunnaðir um hendingina.