Eitt íslendskt uppisjóvarskip sendi seinnapartin í gjár neyðarkall, eftir at eldur var kyknaður umborð, meðan skipið sigldi úr Føroyum til Íslands. Hendingin fór fram umleið 15 sjómíl norðan fyri Føroyar.

MRCC Tórshavn og Tórshavn Radio móttóku neyðarkallið á VHF-rás 16 klokkan 14.55 UTC. Hjálp varð send beinanvegin. Vaktar- og bjargingarskipið Brimil setti kós móti skipinum, og Rescue Vón av Eiði, sum eisini hoyrdi neyðarkallið, fór á staðið.

Longu klokkan 15.02 UTC komu boð frá skipinum um, at eldurin var sløktur. Eingin hevði fingið skaða av hendingini.

Eftir hendingina tók Brimil skipið á sleip til Føroya. Samstundis vórðu íslendskir myndugleikar kunnaðir um hendingina.