Samleikin hevur fingið endurnýggjaða altjóða ETSI-góðkenning, sum váttar, at tænastan framvegis lýkur altjóða krøv til trygd, góðsku og álítandi talgilda tænastuveitingar.

Góðkenningin er ein týðandi álitisváttan fyri Talgildu Føroyar og vísir, at arbeiðsgongdir og trygdarskipanir hjá Gjaldstovuni framhaldandi eru í samsvari við altjóða viðurkendar standardir fyri álit, trygd, váðastýring og eftirlit.

Við umleið 52.000 brúkarum og nærum 100.000 innritanum um vikuna er Samleikin ein grundleggjandi partur av talgilda samfelagnum, sum gevur atgongd til tænastur sum banka-, heilsu- og borgaratænastur. Tí er tað av stórum týdningi, at skipanin heldur fram at lúka strangastu trygdarkrøv.

ETSI er ein evropeisk standardiseringsfyritøka, sum arbeiðir við felags reglum og standardum fyri talgildar tænastur, elektroniskar undirskriftir og talgildar samleikar, við endamálinum at styrkja trygd og álit í talgildum samskifti.