Lóggávutingið á Falklandsoyggjum hevur heitt á aganevndina hjá FIFA um at kanna argentinska fótbóltslandsliðið eftir HM-dystin móti Onglandi 15. juli.
Eftir argentinska sigurin vístu spælarar eitt skelti við orðunum „Las Malvinas son Argentinas“ – Malvinoyggjarnar eru argentinskar. Sambært kæruni vórðu líknandi boðskapir eisini vístir í argentinska skiftirúminum.
Kallar boðskapin politiskan
Í einum brævi til FIFA skrivar Jack Ford, formaður í lóggávutinginum, at talan var um ein greiðan politiskan boðskap um ræðisrættin yvir Falklandsoyggjum.
Hann vísir á, at reglurnar hjá FIFA banna politiskum boðskapum á leikvøllum og øðrum økjum, sum eru knýtt at dystum. Argentinska fótbóltssambandið er áður revsað fyri líknandi framferð.
– Fótbóltur er fyrst og fremst ítróttur, skrivar Jack Ford. Hann tekur samstundis undir við bretska ráðharranum Peter Kyle, sum hevur sagt, at politikkur ikki eigur at verða blandaður upp í ítrótt.
Kríggj um oyggjarnar
Ósemjan um Falklandsoyggjarnar elvdi í 1982 til kríggj millum Argentina og Stórabretland. Argentina hertók oyggjarnar, men eftir eitt 74 dagar langt kríggj tóku bretskar herdeildir tær aftur.
Í kæruni verður víst á, at kríggið framvegis setur djúp spor millum íbúgvarnar á oyggjunum. Tí verður argentinski boðskapurin eftir dystin mettur at vera serliga kensluleysur.
Í brævinum verður eisini víst á fólkaatkvøðuna í 2013. Tá atkvøddu 99,8 prosent fyri, at Falklandsoyggjarnar framhaldandi skuldu vera bretskt yvirhavsøki. Valluttøkan var umleið 92 prosent.
Argentina góðtekur ikki, at íbúgvarnir á oyggjunum sjálvir kunnu avgera spurningin um ræðisrættin. Landið heldur fast við, at oyggjarnar eru argentinskt øki, og nevnir tær Islas Malvinas.
