Í minsta lagi fimm fólk hava latið lív í einum skottilburði í týska býnum Stade, vestan fyri Hamburg. Tað upplýsir eitt talsfólk hjá týsku løgregluni, sambært Reuters.

Skottilburðurin fór fram í Dankersstraße-økinum í miðbýnum í Stade, har umleið 50.000 fólk búgva.

Løgreglan hevur sperrað økið av og heitir á borgarar um at halda seg burtur, meðan kanningararbeiðið fer fram.

Ein maður er handtikin í sambandi við skottilburðin. Løgreglan hevur enn ikki upplýst, um talan bert er um tann eina gerningsmannin, ella um fleiri kunnu hava verið uppi í málinum.

Orsøkin til skottilburðin er framvegis ókend, og myndugleikarnir hava heldur ikki upplýst, um fólk eru særd. Tí kann talið av deyðum og særdum broytast, eftir at løgreglan fær betri yvirlit yvir støðuna.

Kanningararbeiðið heldur fram, og væntandi fer løgreglan at kunngera fleiri upplýsingar, tá ið tey avvarðandi eru kunnað, og tær fyrstu kanningarnar eru lidnar.