Um hann var á veg heim á ólavsøku og ikki fekk fart, sigur søgan einki um. Men mitt í nátt tók løgreglan ein mann mitt í Eysturoyartunlinum. Hann varð tikin tí hann var á veg ígjøgnum tunnilin á el-rennihjóli.

Annars er tað bara loyvt at fara ígjøgnum tunnilin í bili ella á motorsúkklu, men um trý tíðina í nátt ringdu fólk, sum koyrdu ígjøgnum tunnilin, at melda, at ein var á veg ígjøgnum tunnilin á el-rennihjóli.

Løgreglan sá eisini á vakmyndatólinum hvar hann var staddye, so tey fóru eftir honum og tóku hann upp mitt inni í tunlinum. Tey koyrdu hann til hús, men hann fær bót fyri at fara ígjøgnum tunnilin á el-rennihjóli. Hann fær eisini bót fyri at koyra á el-rennihjóli yvirhøvur, tí tey eru forboðin í Føroyum.

Verða fólk tikin á el-rennihjóli, er treytin, at hald verður lagt á tað og fólk fáa tað ikki aftur.

Tað er hvørk loyvi at ganga, renna ella at súkkla í gjøgnum Eysturoyartunnilin og tað er heldur ikki loyvt at koyra ígjøgnum hann á prutli ella skutara.