Mikudagin 12. august verður himmalin yvir Føroyum karmur um eitt sjáldsamt náttúrufyribrigdi. Klokkan 17.56 byrjar mánin spakuliga at leggja seg fyri sólina. Klokkan 18.54 er sólarmyrkingin í hæddini, og klokkan 19.50 er hon av. Tá ið myrkingin er størst, verða umleið 91 prosent av sólini fjald av mánanum.

Tað verður ikki eins dramatiskt sum fulla sólarmyrkingin í 2015. Men áhugin er stórur, og kring landið verður nú fyrireikað til teir knappu tveir tímarnar, tá ið mánin fer fram fyri sólina.

Tað verður ikki myrkt

Hanus Kjølbro á Veðurstovu Føroya hevur greitt frá, at hóast 91 prosent av sólini verða fjald, verður tað ikki veruliga myrkt í Føroyum.

– Mánin fer at fjala ein stóran part av sólini, men ikki so nógv, at tað verður myrkt, sigur hann.

Orsøkin er, at sjálvt ein lítil partur av sólini framvegis gevur sera nógv ljós. Sambært Hanusi Kjølbro kann løtan tí fyri summi kennast sum eitt vanligt, eitt sindur kámt kvøld. Hitin kann tó broytast. Hann metir, at hitin kann falla eini tvey til trý stig, meðan sólarmyrkingin er í hæddini.

Fjøllini kunnu koma í vegin

Sólarmyrkingin kemur seint seinnapartin, og tí er ikki líkamikið, hvar fólk standa.

Tá ið myrkingin byrjar, stendur sólin í útsynningi og 24 stig oman fyri havsbrúnna. Tá ið myrkingin er størst, stendur hon í vestri og 17,5 stig oman fyri havsbrúnna. Tá ið hon endar, er sólin bara 11 stig oman fyri havsbrúnna.

Tí kunnu fjøll og lendið annars avgera, um frítt útsýni er til sólina. Eitt einfalt ráð er at kanna dagin fyri, um sólin sæst frá staðnum um somu tíð.

Veðurstovan savnar fólk

Í Klaksvík verður skipað fyri einum felagstiltaki uppi á Hálsi, um veðrið loyvir tí. Veðurstova Føroya bjóðar áhugaðum at síggja sólarmyrkingina saman frá klokkan 18.15 til 19.30.

Starvsfólk á Veðurstovuni fara at greiða frá sólarmyrkingum og svara spurningum. Brillur verða eisini til láns hjá teimum, sum ikki hava sínar egnu.

Fleiri kommunur hava tikið stig til at tryggja, at borgararnir kunnu hyggja at fyribrigdinum uttan at seta sjónina í váða.

Skopunar kommuna hevur keypt sólarmyrkingarbrillur til íbúgvarnar. Tær hava verið tøkar á kommunuskrivstovuni frá 10. august.

Skálavíkar kommuna hevur somuleiðis keypt brillur til allar borgarar í kommununi.

Á Tvøroyri hevur kommunan serliga mint fólk á, at tey ongantíð skulu hyggja beinleiðis at sólini uttan góðkendar sólarmyrkingarbrillur ella aðra verju, sum er ætlað til endamálið.

Brillurnar eru vorðnar ein søluvøra

Eisini handilslívið hevur fingið eyga á sólarmyrkingina.

Tjaldurs Apotek í Klaksvík selur sólarmyrkingarbrillur og boðar samstundis frá, at nøgdin er avmarkað. Aðrastaðni verða brillur eisini seldar, og føroyska fyritøkan Eclipse.fo hevur skipað fyri kapping um góðkendar brillur og útgerð til myndatøku.

Á matstovuni Tubbak í Havn verður sólarmyrkingin enntá gjørd til eitt kvøldartiltak, har gestir kunnu síggja hana av takterrassuni. Matstovan sigur seg eisini hava sólarmyrkingarbrillur til gestirnar.

Brillurnar eru ikki bara pynt

Tann týdningarmesta áminningin er tó tann sama sum í 2015: Hygg ikki beinleiðis at sólini uttan røttu verjuna.

– Vit mugu minnast til at brúka rættar brillur, akkurát sum í 2015, ávarar Hanus Kjølbro.

Um skýggini halda seg burtur, verður sjónin serstøk. Klokkan 18.54 verður bara ein smalur partur av sólini eftir at síggja oman fyri mánan.

Í tilsamans ein tíma og 54 minuttir fáa føroyingar sostatt høvi at fylgja mánanum, meðan hann ferðast fram fyri sólina – men ikki við berum eygum.