Føroyar og Grønland hava skriva undir nýggjan sáttmála um fiskiveiðisamstarv. Sáttmálin varð undirritaður í Føroyum fríggjadagin 26. juni av Bárði á Steig Nielsen, uttanríkis- og fiskimálaráðharra, og Peter Borg, fiskimálaráðharra í Grønlandi.

Dagføring av sáttmála frá 1997

Nýggi sáttmálin er ein dagføring av rammusáttmálanum frá 1997. Hann ásetur meginreglurnar fyri fiskivinnusamstarvinum millum londini.

Tær týdningarmestu ásetingarnar snúgva seg um kvotuflytingar, atgongd, eftirlitssamstarv og vinnuligt samstarv á fiskivinnuøkinum.

Sáttmálin leggur eisini dent á vísindaliga grundaða umsiting av fiskastovnum og samstarv um havlívfrøði og havumhvørvi.

Skal viðgerast í Løgtinginum

Viðurskiftini í sáttmálanum verða viðgjørd í árligu samráðingunum millum Føroyar og Grønland.

Bárður á Steig Nielsen sigur, at fiskiveiðisamstarvið millum londini hevur langa søgu og stóran týdning fyri bæði londini. Hann vónar, at nýggi sáttmálin verður karmur um eitt víðkað samstarv í framtíðini.

Peter Borg sigur, at Føroyar eru ein týdningarmikil samstarvsfelagi hjá Grønlandi á fiskivinnuøkinum. Hann sigur eisini, at tað er týdningarmikið at dagføra karmin um samstarvið, so hann verður framtíðartryggjaður.

Sáttmálin verður lagdur fyri Løgtingið sum uppskot til samtyktar í heyst.