Føroyar luttóku dagarnar 9.–11. juni á ST-ráðstevnuni COSP19 í New York. Hetta var fyrstu ferð, at Føroyar vóru við á ráðstevnuni, sum er størsta altjóða samkoman um rættindini hjá fólki, ið bera brek.
Margit Stórá, landsstýriskvinna, helt innleggið hjá Kongaríkinum Danmark í høvuðssalinum hjá ST. Hon legði dent á luttøku, javnrættindi og týdningin av, at fólk, ið bera brek, fáa eina sterka rødd í samfelagnum.
Føroyar vóru vertir fyri norðurlendskum tiltaki
Føroyar og Danmark vóru eisini vertir fyri einum norðurlendskum síðutiltaki um virkna samfelagsluttøku hjá ungum, ið bera brek.
Margit Stórá helt setanarrøðuna. Seinni bjóðaðu Føroyar og Danmark umboðum úr Norðurlondum, Baltisku londunum, ST og altjóða áhugafelagsskapum til móttøku.
Hon hevði eisini fundir við íslendska almanna- og bústaðarmálaráðharran, Ragnar Þór Ingólfsson, og bretska ráðharran Sir Stephen Timms. Tey umrøddu Breksáttmálan, sosialar tænastur og felags avbjóðingar.
Ítróttur kann skapa broytingar
Margit Stórá var eisini høvuðsrøðari á einum altjóða tiltaki um ítrótt og sosialar broytingar. Hon vísti á, at ítróttur kann fremja javnstøðu, felagsskap og inklusjón.
Føroyska sendinevndin vitjaði harumframt felagsskapir í New York, sum arbeiða við bústaðarloysnum, arbeiðsluttøku og sjálvstøðugum lívi hjá fólki, ið bera brek.
