Ein nýggj vísindalig kanning av føroyska arbeiðsmarknaðinum vísir greitt samband millum krevjandi kropsligt arbeiðið og pínu í lendi, nakka og akslum. Hetta er fyrsta breiða kortleggingin av ergonomiska arbeiðsumhvørvinum hjá føroyskum arbeiðstakarum.

Kanningin fevnir um 5.198 arbeiðstakarar. Av teimum vóru 3.853 við í høvuðsgreiningunum. Tað svarar til umleið 18 prosent av øllum føroyska arbeiðsmarknaðinum. Upplýsingarnar vórðu savnaðar frá apríl til desember 2021.

Mest pína við størsta arbeiðsálagnum

Úrslitini vísa eitt týðiligt mynstur: Jú størri tyngri og meira krevjandi arbeiðið er, tess meiri er pínan.

Kvinnur í bólkinum høvdu í miðal 2,47 stig hægri lendapínu enn kvinnur við minni krevjandi kropsligt arbeiðið. Hjá monnum var munurin 1,42 stig. Pínan í nakka og akslum var 1,51 stig størri hjá teimum arbeiðstakarunum, sum høvdu krevjandi kropsligt arbeiðið

Serliga tað at skumpa, toga, bera og lyfta hevði sterkt smband við lendapínu. At arbeiða við boygdum ella snaraðum ryggi og at skumpa ella toga hevði sterkast samband við pínu í nakka og akslum.

Stórur munur millum starvsbólkar

Arbeiðstakarar í kropsliga krevjandi størvum høvdu sum heild meiri pínu. Í teimum ymisku starvsbólkunum lá lendapínan millum 1,84 og 3,84 stig, meðan pínan í nakka og akslum lá millum 2,34 og 4,14 stig á einum stiga frá 0 til 10.

Granskararnir leggja tó dent á, at talan er um eina tvørskurðarkanning. Kanningin kann tí vísa á eitt samband, men hon kann ikki prógva, at arbeiðsálagið beinleiðis elvir til pínuna. Harumframt vóru starvsbólkar við kropsliga krevjandi arbeiði undirumboðaðir í kanningini.

Kanningin er skrivað av Rúna Bláfoss, Lars Louis Andersen, Simone Vestergaard Christiansen, Thomas Clausen, Páli Weihe og Anniku Helgadóttir Davidsen. 

Hon varð almannakunngjørd 6. juli 2026.