Føroyskur tónleikur fekk stóran heiður, tá Kári Bæk og Eli Tausen á Lava fingu hvør sína virðisløn í Messuni í Sørvági fríggjakvøldið 23. oktober.
Kári Bæk fekk Heiðursgávu landsins á 75.000 krónur fyri sítt drúgva arbeiði fyri føroyskan tónleik og kórsang. Eli Tausen á Lava fekk Virðisløn landsins til ungt listafólk á 50.000 krónur fyri sítt nýskapandi tónlistarliga virksemi.
Kári Bæk hevur sett djúp spor í føroyskan tónleik
Kári Bæk hevur í meira enn hálva øld verið ein týðandi persónur í føroyskum tónleikalívi.
Sum tónaskald, tónleikari og kórleiðari hevur hann verið við til at menna bæði klassiskan tónleik og føroyskan kórsang.
Hann er serliga kendur fyri síni kórverk og kórútsetingar, men hevur eisini skrivað tónleik fyri bæði smærri og størri ljóðførisbólkar.
Kári Bæk hevur stjórnað fleiri føroyskum kórum, teirra millum Vestmanna sangkóri, Tórshavnar kamarkóri og Tórshavnar manskóri. Hann hevur eisini stjórnað GHM og spælt obo í Føroya Symfoniorkestri.
Í 2012 varð tónaverk hansara Askur & Embla – Fyrsti dagur má vera í uppskoti til Tónlistavirðisløn Norðurlandaráðsins.
Eli Tausen á Lava gongur nýggjar leiðir
Eli Tausen á Lava umboðar eitt nýtt ættarlið av føroyskum tónaskøldum, sum sameina klassiskan samtíðartónleik og elektroniskan tónleik.
– Eli Tausen á Lava umboðar eina nýggja og spennandi rødd í føroyskum tónleiki, segði Bárður á Lakjuni, landsstýrismaður í mentamálum.
Eli hevur tónleikaútbúgvingar frá New York University og Malmö Academy of Music.
Tónaverk hansara Let Me Cry varð í 2026 tilnevnt Tónlistavirðisløn Norðurlandaráðsins.
Við virðislønunum verða bæði drúgvar føroyskar tónleikahevdir og nýskapandi tónlistarligt arbeiði heiðrað.
