Noomi í Dali hevur starvast á Setrinum síðani tíðina, tá stovnurin æt Føroya Læraraskúli. Starvsfelagar og leiðsla heiðraðu hana við felagssangi, røðum og ábiti í lon 7 á Frælsinum, har hon undirvísir til dagligt.
Rektarin: Ein av fremstu serfrøðingunum
Martin Tvede Zachariasen, rektari á Fróðskaparsetri Føroya, takkaði Noomi í Dali fyri trúfesti og arbeiðið gjøgnum nógv ár.
– Tú ert ein av fremstu serfrøðingunum í føroyskum handarbeiði og føroyskari siðvenju í sambandi við handarbeiði, segði rektarin millum annað.
Hann vísti eisini á, at Noomi í Dali hevur verið við til at menna bæði undirvísingina og fakøkið á Setrinum.
Læraralesandi sýndu fram arbeiði
Karmurin um hátíðarhaldið var ein framsýning við arbeiðum, sum læraralesandi á handarbeiðslinjuni høvdu gjørt.
Kalpana Vijayavarathan, dekanur á Námsvísindadeildini, helt eisini røðu fyri Noomi í Dali.
– Vegna alla deildina takki eg tær fyri tín eldhuga, listaliga dugnaskap og mongu løturnar, sum hava ríkað hesa deildina og alt Setrið, segði dekanurin millum annað.
