Stórar føroyskar ídnaðarfyritøkur kunnu fáa nýggjar møguleikar at skifta oljuna út við varandi orku. Sev arbeiðir við einum nýggjum samstarvsmodelli, sum skal gera tað lættari hjá ídnaðinum at leggja um til grøna orku.

Eitt ítøkiligt dømi er Eysturlund, sum eftir ætlan skal framleiða elorku til Havsbrún.

Nýggj loysn skal rudda forðingar av vegnum

Sambært Sev hevur higartil ikki borið til at finna hóskandi loysnir til stórar ídnaðarfyritøkur, sum brúka nógva olju, innan fyri verandi lógarverk.

Longu í veðurlagspolitikkinum frá 2021 varð staðfest, at tørvur var á at leggja ídnaðin um frá olju til elorku. Serliga fóðurframleiðsla og stórar maskinur í byggivinnuni vórðu nevnd sum stórir oljunýtarar.

Nú er eitt nýtt samstarvsmodell skotið upp.

Skipanin byggir á, at ein orkuframleiðari selur varandi elorku til Sev, sum síðani selur hana víðari til ein ávísan brúkara, ið nýtir streymin í staðin fyri olju.

Talan kann millum annað vera um elketlar, hita til ídnaðarframleiðslu, framleiðslu av grønum brennievnum og elnýtslu á orku- og oljupallum.

Vanligi elkundin skal ikki gjalda

Ein týðandi partur av uppskotinum er, at vanligir elkundar ikki skulu gjalda fyri kostnaðir og fíggjarligan váða, sum standast av einstøku verkætlanunum.

Hesar útreiðslur og hesin váði skulu í staðin berast av pørtunum, sum luttaka í verkætlanunum.

Sev skal standa fyri flutningi, máting og avrokning av orkuni og samstundis tryggja, at elskipanin verður rikin á tryggan og skipaðan hátt.

Sambært Sev eru orkumyndugleikin, umboð fyri ídnaðarvinnuna og Sev nú í samskifti um eina felags loysn, sum kann minka munandi um oljunýtsluna í Føroyum.