Sambært vaktleiðaranum á politistøðini hava tað bert verið smærri uppgávur, sum løgreglan hevur tikið sær av, hóast Voxbotn var á Vaglinum og nógv fólk vóru savnað í miðbýnum.

Millum annað hava verið onkrar ósemjur millum fólk, har løgreglan hevur meklað, og tey hava eisini koyrt nøkur full fólk til hús.

Løgreglan kannar tó eitt harðskapsmál, eftir at fráboðan er komin um, at ein persónur hevur sligið ein annan, sum fekk nakað av skaða.

Málið verður kannað nærri í dag, sigur vaktleiðarin. Harðskapsmálið fór tó ikki fram inni á konsertøkinum í Vágsbotni.