Legg fartelefonina frá tær, sløkk skíggjan og hygg upp. Tað er áheitanin frá Heilsustýrinum, sum leygardagin 24. oktober skipar fyri átakinum „Sløkkið saman“ fyri triðju ferð.

Endamálið er at fáa fólk at steðga á og hugsa um, hvussu nógva tíð tey brúka framman fyri skíggjanum.

Sambært Heilsustýrinum er fartelefonin vorðin ein so natúrligur partur av gerandisdegnum, at nógv kanna boð og sosialar miðlar uttan at hugsa um, hvussu ofta tey gera tað.

Ein heilur dagur ella nakrir tímar

Avbjóðingin er einføld: Legg telefonina frá tær og royn at vera uttan skíggja so leingi sum gjørligt.

Tað kann vera ein heilan dag ella nakrar tímar.

Heilsustýrið eggjar fólki til at brúka tíðina saman við øðrum, fáast við okkurt, teimum dámar, ella njóta friðin uttan órógv frá telefonini.

Tað týdningarmesta er ikki, hvussu leingi skíggin er sløktur, men at gerast meira tilvitaður um sínar skíggjavanar.