Jóhannis Joensen, løgtingsmaður, hevur sett Eyðdis Hartmann Niclasen, landsstýriskvinnu í heilsu- og orkumálum, ein skrivligan fyrispurning um nýggju kommunulæknaviðtaluna í Vágum.

Hann spyr, nær landsstýriskvinnan væntar, at viðtalan verður mannað. Hann vil eisini vita, um arbeitt verður fyri, at ein kvinnuligur kommunulækni verður knýttur at kommunulæknaskipanini í Vágum.

Hølini eru klár

Undanfarna samgonga og fíggjarnevndin játtaðu pening til nýggju viðtaluna, og kommunurnar hava gjørt hølini klár. Kortini er viðtalan enn ikki tikin í nýtslu.

Í dag eru tveir mannligir kommunulæknar knýttir at læknaviðtalunum í Vágum. Jóhannis Joensen vísir á, at fleiri borgarar hava ynskt eisini at kunna velja ein kvinnuligan kommunulækna.

Sambært upplýsingum, sum áður eru givnar, var ætlanin, at viðtalan skuldi vera klár í 2026. Nú verður landsstýriskvinnan biðin um at greiða frá, nær hon verður mannað.