Halla Tómasdóttir, forseti Íslands, og maður hennara, Björn Skúlason, vitjaðu í hesari vikuni Tórshavnar kommunu.

Vitjanin byrjaði við morgunmati í Móttøkuhúsinum, har Elsa Berg, borgarstjóri, tók ímóti og beyð teimum vælkomnum. Har fingu gestirnir høvi at tosa um vitjanina og um tey sterku bondini millum Føroyar og Ísland.

Søgulig vitjan í Móttøkuhúsinum

Elsa Berg vísti á, at fyrsti útlendski gesturin í Móttøkuhúsinum í 1987 var Vigdís Finnbogadóttir, táverandi forseti Íslands.

Nú vitjaði onnur kvinnan í íslendska forsetaembætinum sama hús næstan 40 ár seinni. Borgarstjórin segði, at hetta gav høvi at líta aftur við takksemi og frameftir við bjartskygni.

Smá samfeløg kunnu hugsa stórt

Í røðu síni legði Elsa Berg dent á, at smá samfeløg bæði tora og kunnu hugsa stórt. Hon nevndi nýhugsan, varandi orku og burðardygd sum øki, har Føroyar og Ísland kunnu læra av hvørjum øðrum.

Hon vísti eisini á samstarv um útbúgving, gransking og altjóða netverk. Millum annað nevndi hon UArctic-ráðstevnuna, sum Tórshavn var vertur fyri fyrr í ár.

Eftir morgunmatin framførdu Beinta Ingeborg Greve og Aksel Remmel tónleik. Síðani vitjaði fylgið Hugskotið og Fróðskaparsetur Føroya.

🔗 Sí fleiri myndir frá vitjanini á heimasíðuni hjá Tórshavnar Kommunu.