Kristel Lisberg fer á pallin, tá nýggi countryfestivalurin Longhorn CPH verður hildin í Pumpehuset í Keypmannahavn 4. og 5. juni 2027.

Føroyska songkvinnan er millum fyrstu tónleikararnar, sum fyrireikararnir hava kunngjørt til festivalin. Á skránni verða bæði danskir og útlendskir countrytónleikarar.

Úr Føroyum til Nashville

Kristel Lisberg hevur arbeitt miðvíst við sínum countrydreymi. Hon hevur gjørt tónleikaupptøkur í Nashville í USA og samstarvað við royndar sangskrivarar og tónleikarar í amerikanska countryumhvørvinum.

Fyrireikararnir lýsa hana sum eina songkvinnu, ið sameinir sínar norðurlendsku røtur við amerikanska countrytónleikinum.

Á festivalinum kunnu áhoyrararnir vænta countrytónleik, sterkar sangir og persónligar frásagnir.

17 konsertir á trimum pallum

Longhorn CPH verður hildin á fyrsta sinni í 2027. Til samans verða 17 konsertir á trimum pallum, bæði inni í Pumpehuset og í garðinum, sum hoyrir til spælistaðið.

Millum kunngjørdu nøvnini eru amerikanski Dale Watson, svenska Emelie Torstensson og donsku Johnny Horsepower, DOT og Leo Bang. Eisini er Marc Oliver, sum hevur tilknýti til bæði USA og Danmark, á skránni.

Fyrireikararnir hava boðað frá, at 12 onnur nøvn verða kunngjørd seinni.

Festivalurin fer at bjóða bæði siðbundnan countrytónleik, Nashville-tónleik og ráari honky-tonk-tónleik.

Atgongumerkjasølan er byrjað, og sambært fyrireikarunum er talið á atgongumerkjum avmarkað.