Fleiri føroyskar heimasíður kunnu vera í vanda fyri álopum frá teldusníkum. Ein nýggj kanning hjá Parentium.fo vísir, at 29 føroysk navnaøki brúka tøkni, sum kann hava álvarsligar trygdarveikleikar.

Tað skrivar Kristian Eli Zachariasen, KT-stjóri hjá Bakkafrost, í einum uppslagi á LinkedIn.

4.573 navnaøki á listanum

Parentium.fo hevur savnað 4.573 føroysk navnaøki til kanningina. Eitt navnaøki er til dømis adressan á einari heimasíðu.

Endamálið er at kanna møguligar veikleikar í PHP, sum er ein tøkni, ið nógvar heimasíður brúka.

Higartil eru 46 navnaøki merkt til nærri kanningar. Á 29 teirra eru funnar PHP-útgávur, sum kunnu hava trygdarveikleikar.

Hetta merkir tó ikki, at teldusníkar hava brotið seg inn á heimasíðurnar, ella at upplýsingar eru stolnar. Úrslitini benda bert á, at tørvur er á at kanna síðurnar nærri.

Teldusníkar kunnu stjala upplýsingar

Um teldusníkar gagnnýta slíkar veikleikar, kunnu teir í ringasta føri sleppa inn á heimasíðurnar og stjala ella broyta upplýsingar.

Fyri fyritøkur kann hetta hava stórar avleiðingar. Tær kunnu missa pengar, arbeiðið kann steðga upp, og viðskiftafólk kunnu missa álitið á teimum.

Kristian Eli Zachariasen heitir tí á fyritøkur um at kanna trygdina á sínum heimasíðum.

Fyritøkur og stovnar eiga at tryggja, at tøknin er dagførd, og at trygdaravrit av týdningarmiklum upplýsingum eru tøk.

Á Parentium.fo kunnu eigarar kanna síni egnu navnaøki fyri møguligum veikleikum. Kanningin gevur tó ikki endaligt svar um trygdina. Til tess krevst ein neyvari tøknilig kanning.