Føroya Lærarafelag vil hava skapandi lærugreinarnar at fáa størri rúmd í fólkaskúlanum. Tórhallur við Gil, næstformaður í Lærarafelagnum, vísir á, at ov lítil tímajáttan leingi hevur gjørt, at næmingar ikki fáa nóg góðar møguleikar at royna og menna sínar førleikar í hesum lærugreinunum.

Landsstýrismaðurin ætlar at styrkja økið

Á aðalfundi Føroya Lærarafelags fyrr í ár boðaði Bárður á Lakjuni, landsstýrismaður í undirvísingar- og mentamálum, frá, at skúlarnir skulu fáa størri frælsi at skipa ein skapandi skúla. Hann fer eisini at viðgera eitt tilmæli um at menna og umskipa lærugreinina handaverk og list.

Kann kveikja áhuga hjá næmingum

Tórhallur við Gil vísir á, at handaligar og tónlistaligar lærugreinar kunnu styrkja trivnaðin og geva næmingum høvi at menna aðrar førleikar enn teir bókligu.

Hann heldur eisini, at skapandi lærugreinar kunnu kveikja áhugan hjá næmingum fyri seinni at velja sær útbúgving innan handverk ella tónleik.