Vánalig uppmøting, ófriður í flokkunum, fartelefonir og ov lítil dentur á fakliga læring. Hetta eru nakrir av trupulleikunum, sum sambært Bergi Samuelsen gera tað torført at bøta munandi um føroysku PISA-úrslitini.

Bergur Samuelsen, nevndarlimur í Føroya Lærarafelag, vísir í grein á heimasíðu felagsins á, at fleiri viðurskifti í fólkaskúlanum darva læringini.

42 prosent hava trupult við lesing

Sambært tølunum, sum Samuelsen vísir á, hava 42 prosent av teimum 15 ára gomlu trupult við at skilja innihaldið í vanligum skrivligum tekstum.

Hann heldur, at vantandi hugsavnan er ein vaksandi avbjóðing.

– Færri næmingar, nú enn fyrr, klára at fara í dýpdina við tekstum og uppgávum. At halda fokus er trupult hjá fleiri. Fartelefonin og sosialir miðlar eru uttan iva ein partur av orsøkini, skrivar hann.

Eisini ófriður í skúlastovunum er ein álvarsligur trupulleiki.

– Trupulleikin við ófriði má so ella so loysast, tí hann gongur í stóran mun út yvir bæði fakligheit og trivnað í fleiri flokkum.

Skúlin er ikki undirhald

Samuelsen heldur, at størri dentur má leggjast á fakliga læring, arbeiðsfrið og góðan aga.

– Øll mugu skilja, at skúlin er ein lærustovnur og ikki undirhald, skrivar hann.

Hann ávarar eisini um, at vitlíki kann gera skúlaarbeiðið fyri næmingarnar, so teir ikki mennast fakliga.

Hóast avbjóðingarnar hevur hann álit á framtíðini hjá teimum ungu. Men grundarlagið má vera í lagi.

– Men at lesa, skriva og rokna verður altíð fundamentið, sum lærast skal væl og virðiliga.