Nú seinnapartin er fótbóltslandsliðið savnað til fyrstu fyrireikingarnar til Nations League.

Kappingin fevnir um seks dystir, og fýra av dystunum eru á skrá næstu vikurnar.

Leygardagin klokkan 17 verður Kasakstan mótstøðuliðið á Tórsvølli. Týsdagin spæla Føroyar í Moldova, fríggjadagin í næstu viku verður heimadystur ímóti Slovakia, og týsdagin í aðru viku verður Kasakstan á útivølli mótstøðuliðið.

Tá ið landsliðið er saman og fyrireikar seg til landsdystir, plagar hópurin at halda til á einum at hotellunum í Havn. Soleiðis er tað ikki hesa ferð. Ella soleiðis er tað ikki í dag og í morgin. Hesa ferð eru landsliðsspælararnir við hús. Av teimum 23, sum eru savnaðir, umboða 13 útlendsk feløg. Teir eru heima hjá familjuni. Seinnapartin í dag og aftur seinnapartin í morgin fara teir at venja og fundast og so fara teir til hús aftur.

Mikudagin verður aftur venjing, og tá fer allur hópurin á hotell at halda til.