Mentanarnevndin í Eysturkommunu hevur samtykt at arbeiða víðari við Fransagravunum í Leirvík. Avgerðin varð tikin á seinasta fundinum fyri summarsteðgin, sum varð hildin úti við Fransagravirnar á jóansøku.

Fransagravirnar liggja úti á Flatum. Søgan um tær hevur í mong ár livað á manna munni í Leirvík. Sambært frásøgnum vóru børn og ung ikki altíð trygg, tá tey fóru fram við staðnum heim úr gerðum í økinum.

Gomul søga skal lýsast betur

Mentanarnevndin hevur seinasta árið vitjað fleiri forkunnug fornminnisstøð í kommununi. Ætlanin er at halda fram og vitja allar bygdirnar í kommununi fyri at kanna, hvussu mentanarsøgan kann varðveitast betur.

Endamálið er bæði at verja støðini, lýsa søguna í teksti og halda hana livandi millum fólk.

Gravirnar kunnu gerast sjónligari

Nú verður kannað, hvør vitan fæst um Fransagravirnar. Samstundis skal arbeiðast við at miðla søguna á hóskandi hátt og kanna, um gravirnar kunnu gerast meira sjónligar.

Fransagravunum eru eisini ognað nøkur orð í fjórða bindi av Leirvíkar bygdarsøgu eftir Martin Fjallstein.