Tað staðfesta granskarar hjá Havgranskingarstovninum í Noregi í einum svari upp á eitt aktuelt kjak um makrelstovnin.

Granskararnir vísa aftur pástandum um, at makrelstovnurin er nógv størri enn mett, og at nógv meira kundi verið fiskað. 

Teir leggja dent á, at ICES í 2025 dagførdi sín metingarhátt, sum gav hægri søgulig metingar av stovninum, men ikki broytti sjálva gongdina.

Rekrutteringin er fallin

Sambært granskarunum hevur tilgongdin av nýggjum ættarliðum av makreli verið nógv veikari seinastu tíggju árini enn árini frammanundan. 

Tað er høvuðsorsøkin til afturgongdina frá 2013 til 2022. Samstundis hevur fiskitrýstið verið hægri enn tað, ICES hevur mælt til.

ICES mælir til stórar skerjingar

Gytingarstovnurin er nú undir kritiska stiginum, og trýstið frá fiskiskapi seinastu trý árini hevur verið væl omanfyri burðardygt støði. Tí mælir ICES fyri 2026 til, at veiðan verður munandi skerd, so stovnurin skjótari kann byggjast upp aftur.

Granskararnir vísa eisini á, at bæði altjóða kanningar, árligar trolkanningar og dátur frá merking av makreli vísa sama mynstur: Makrelstovnurin er á lægsta støði, sum higartil er skrásett í hesum kanningunum.