Næmingar í fronskum á Miðnámi á Kambsdali hava verið á fakligari mál- og mentanarferð í Québec saman við Honnu Jensen, lærara.

Ferðin hevði sum endamál at geva næmingunum beinleiðis royndir við fronskum máli og fransktmælta mentan í Kanada.

Fyrstu dagarnar vóru næmingarnir í Montréal, har ferðalagið vitjaði søgulig støð, mentanarlig øki og lærdi um býin, sum er størsti fransktmælti býur í Amerika.

Næmingarnir vitjaðu millum annað søgusavnið Pointe-à-Callière, vóru á Mont Royal og sóu ymiskar býarpartar við sterkum mentanarligum eyðkennum.

Frá parlamenti til universitet

Ein av høvuðshendingunum var vitjanin í parlamentinum í Québec býi. Har varð dentur lagdur á søguna um, hvussu Québec hevur arbeitt fyri at varðveita franskt mál, mentan og samleika. Allar framløgurnar vóru á fronskum.

Ferðalagið vitjaði eisini á Université Laval, sum er elsta og størsta fransktmælta universitetið í Norðuramerika. Har fingu næmingarnir innlit í lestrarlív, undirvísing og gerandisdagin á einum stórum altjóða kampusi.

Mál, mentan og søguligar upplivingar

Á ferðini varð eisini vitjað á søguligum økjum í Québec býi og seinasta dagin luttóku næmingarnir í katólskari messu í Basilique Notre Dame í Montréal. Tað gav teimum eina ítøkiliga uppliving av tí mentanarliga og trúarliga arvnum, sum hevur merkt Québec gjøgnum søguna.

Ferðin endaði við heimferð um Evropa – og sambært frásøgnini komu øll heilskapað og nøgd heim, hóast eitt lítið petti av hjartanum varð eftir í Québec.