Havnarviðurskiftini í Tvøroyrar kommunu eru rættiliga góð, og bryggjukanturin gevur væl pláss til nógva virksemið, bæði á Tvøroyri og á Drelnesi. 

Men hinvegin, so verður arbeitt við at bøta um viðurskiftini til smærri bátar, bæði vitjandi stuttleikabátar og til útróðrarbátarnar, sum halda til á fjørðinum. 

Nýggjasta byggingin fer í løtuni fram á Hvítanesi, har reisigildi hevur verið á nýggju kappróðrarstøðini, sum í løtuni verður bygd, og sum eftir øllum at døma fer at flyta kappróðurin í kommununi fram á leið. 

- Har var eisini gjørdur ein dráttur til bátarnar, sum tóku lut í kappróðrinum á jóansøku, og hesin dátturin verður permanentur, sigur forkvinnan í havnarnevndini.

- Vit arbeiða eisini í løtuini við at gera eitt umhvørvi til stuttleikabátatar í innara enda á havnalagnum á Tvørábakka. Har verður gjørt eitt hugnaligt umhvørvi, umframt at vit eisini byggja hús við toilettum og vaskimøguleikum til teirra, sum koma higar at vitja við bátum, sigur Anita Vibergsdóttir, forkvinna í havnarnevndini.

Harafturat er munandi bøtt um viðurskiftini longur inni á Trongisvágsfirði, har lokalu útróðrarbátarnir halda til.

Nógv virksemi

Nógv virksemi er á havnalagnum á Tvøroyri, har Varðin Pelagic heldur til. Uppsjóvarskipini koma hagar at landa, men viðgjørdi uppsjóvarfiskurin skal av landinum, og hann verður mangan heintaður av farmaskipum, sum leggja at har.

Umframt tað, so fer ein partur av tí, sum kemur uppá land á Tvøroyri, við strandfaraskipunum norður eftir, og tað sama fer tað, sum Bakkafrost sendir av landinum frá alingini í Suðuroy. 

- Vit hava ongar ætlanir um at leingja bryggjukantin enn, sigur Anita Vibergsdóttir. 

- Plássið er gott sum er, so vit royna at bøta um onnur viðurskifti í løtuni og skapa eitt gott og mennandi umhvørvi fyri tey, sum trívast í bátaumhvørvinum, sigur forkvinnan í havnarnevndini í Tvøroyrar kommunu.

Kommunal havn

Havnirnar og bátahylarnir, sum eru í Tvøroyrar kommunu, eru beinleiðis partur av kommunala virkseminum. 

Havnin er ikki sjálvstøðugt felag, men er partur av kommunala virkseminum og av fíggjarkarminum hjá kommununi. 

Varðin Pelagic hevur skapt nógv virksemi á havnalagnum, har stóra uppsjóvarvirkið heldur til. 

Ætlanir eru um at økja um hetta virksemi, og byggisamtyktin er broytt. 

- Men enn er ongin endalig avgerð tikin um, hvat skal henda, og kommunan hevur ikki givið nakað byggiloyvi enn, sigur Anita Vibergsdóttir. 

Lokalt hevur verið eitt sindur av mótstøðu um, at virkið sleppur at vaksa og økja um virksemi á bryggjuni. 

Summi hava víst á, at hetta fer at gera eitt ov stórt inntriv í býarmyndina – um Varðin Pelagic sleppur at byggja meira á staðnum, har sum virkið heldur til nú. 

- Tað liggur sjálvandi í kortunum, at støða skal takst til hendan spurningin, men ongin endalig avgerð er tikin um spurningin enn, sigur forkvinnan í havnarnevndini.