Kundar í 21 peningastovnum í Danmark, Grønlandi og Føroyum fáa nú møguleika at brúka MobilePay til at gjalda á sama hátt, sum vit kenna tað frá Apple Pay, eitt trýst á síðuna á telefonini og síðani seta telefonina ímóti gjaldsterminalin.
Harvið fáa kundarnir møguleika at brúka eina danska/norðurlendska fartelefonargjaldsskipan í handlum í staðin fyri eina amerikanska.
Í fjør vóru Danske Bank og SEB Kort tey fyrstu, sum tóku MobilePay Tap to Pay í nýtslu. Við loysnini kunnu iPhone-brúkarar velja at brúka MobilePay í staðin fyri Apple Pay.
Frá í dag fylgja enn 21 bankar og sparikassar, sum eru knýttir at dátumiðstøðini NBS. Talan er um fleiri lokal sparikassar, Lån & Spar Bank, grønlendska Bankivik og allir fýra peningastovnarnir í Føroyum.
Tap to Pay við MobilePay er ikki bara fyri iPhone-brúkarar. Eisini Android-brúkarar kunnu nýta loysnina.
Bert ávísir føroyingar kunnu brúka loysnina
Kundar í grønlendska bankanum Bankivik fáa eisini henda møguleikan, og tað sama er galdandi fyri ávísar brúkarar í Føroyum.
MobilePay er framvegis ikki alment tøkt í Føroyum. Tó kunnu føroyingar, sum stovnaðu sær MobilePay, meðan teir búðu í Danmark og framvegis hava danskan bústað og danskt telefonnummar skrásett, brúka nýggju Tap to Pay-loysnina.
Vit spurdu Suðuroyar Sparikassa, hví møguleikin í løtuni bert fevnir um henda bólkin av føroyskum kundum.
Sparikassin vísir á, at talan er um ein spurning, sum bankavinnan í felag svarar upp á:
-Sambært bankavinnuni er orsøkin lógarteknisk. Neyðugu broytingarnar skulu góðkennast bæði í Fólkatinginum og Løgtinginum, áðrenn MobilePay kann verða tikið í almenna nýtslu í Føroyum.
Tá reglurnar eru samtyktar, eigur tann tekniska loysnin at vera klár, soleiðis at føroyskir kundar kunnu fáa atgongd til tænastuna.
