Orkuískoytið til húskir við lágum inntøkum kann hækka úr 5.000 krónum í 12.000 krónur í 2026. Tað svarar til eina hækking á 140 prosent.

Hetta stendur í einum lógaruppskoti, sum sjey løgtingslimir løgdu fram 3. august. Endamálið er at bøta um fíggjarligu støðuna hjá húskjum, sum eru hart rakt av høgum orkuprísum.

Fleiri kunnu fáa stuðul

Samstundis verður skotið upp at hækka inntøkumarkið fyri at fáa orkuískoyti úr 300.000 krónum í 350.000 krónur.

Eisini verður skotið upp at hækka ognarmørkini. Hjá húskjum við einum ella tveimum vaksnum hækkar markið úr 50.000 krónum í 70.000 krónur. Hjá húskjum við trimum ella fleiri vaksnum hækkar tað úr 70.000 krónum í 90.000 krónur.

Hjá persónum upp til 23 ár, sum búgva saman við einum ella báðum foreldrunum, hækkar ognarmarkið úr 50.000 krónum í 70.000 krónur.

Kann kosta 3,8 milliónir krónur

Umleið 400 húskir fingu orkuískoyti í 2025. Sambært uppskotinum kunnu 400–500 húskir fáa rætt til hægri stuðul í 2026.

Mettu útreiðslurnar eru 3,8 milliónir krónur. Uppskotssetararnir vísa á, at ein almenn lækking av meirvirðisgjaldinum á bensini og diesel hevði kostað umleið 20 milliónir krónur. Beinleiðis stuðulin verður tí mettur at kosta landskassan 16,2 milliónir krónur minni.

Eisini verður skotið upp at leingja umsóknarfreistina um orkuískoyti frá 30. juni til 1. oktober 2026.