Sambært íslendska Ríkisútvarpinum ætlar Paul Watson, at skipið Bandero fer til Íslands sum partur av átakinum “Operation 86”. Endamálið er at mótmæla hvalaveiðuni hjá Hvalur hf.

Íslendska sjóverjan váttar, at hon kennir til ætlanina. Myndugleikarnir hava longu verið í sambandi við ríkisløgreglustjóran og fara at fylgja gongdini.

Vísa aftur til 1986

Navnið “Operation 86” er valt við vilja. Tað sipar til hendingina í 1986, tá aktivistar við tilknýti til Watson, søktu tvey íslendsk hvalaveiðiskip í Reykjavík.

Watson verður endurgivin fyri at siga:

– Tað, vit byrjaðu í 1986, fara vit at enda í 2026.

Onki bendir enn á, at Paul Watson ætlar sær til Føroya á hesum sinni.