Ein álvarsligur skottilburður á Virkelyst í Nørresundby norðanfyri Aalborg, hevur í dag skelkað økið. Hetta tí at ein persónur var dripin og fleiri vóru rakt, undir einum skotbardaga millum ein møguligan gerningsmann og løgregluna.
Málið byrjaði, tá Nordjyllands Politi fríggjadagin fekk eina fráboðan um eld í einum bygningi á Virkelyst. Stutt eftir komu upplýsingar um, at eisini skot vóru latin av á staðnum.
Tá løgreglan kom fram, var sambært upplýsingum frá løgregluni skotið eftir politistunum.
Teir svaraðu aftur, og ein skotbardagi tók seg upp millum løgregluna og tann, sum verður mettur at vera gerningsmaðurin.
Undir hendingini vórðu tríggir persónar raktir av skotum. Millum teir vóru ein politistur og tann, sum løgreglan metir vera gerningsmannin.
Triði persónurin var ein tilvildarligur borgari, sum var á staðnum, og hesin doyði seinni av skotunum.
Tann dripni borgarin var sambært teimum seinastu upplýsingunum ikki partur av hendingini, men var tilfeldigt raktur, meðan skotbardagin fór fram.
Løgreglan arbeiðir framvegis við at kanna, hvussu borgarin var raktur, og hvat førdi til ta álvarsligu støðuna.
Økið kring Virkelyst var beinanvegin avbyrgt, og nógv løgreglufólk og bjargingartænastur vórðu send á staðið. Borgarar vórðu bidnir um at halda seg burtur frá økinum, meðan kanningararbeiðið fór fram.
Enn eru eingi almenn upplýsingar komnar fram um motivið aftan fyri hendingina, sambandið millum teir ymisku persónarnar ella nágreiniliga orsøkina til eldibrunan, sum byrjaði málið. Kanningarnar halda fram.
