Starvsfólkatalið í Føroyum heldur fram at vaksa. Í september vóru 30.576 fólk í starvi. Tað eru 508 fleiri enn sama mánað í fjør, svarandi til ein vøkstur upp á 1,7 prosent.
Tað vísa nýggjastu tølini frá Hagstovu Føroya, sum vórðu kunngjørd í dag.
Vøksturin er bæði millum kvinnur og menn. Í september vóru 15.608 menn og 14.968 kvinnur í starvi. Talið av monnum í starvi vaks við 1,8 prosentum og talið av kvinnum við 1,6 prosentum.
Flutningsvinnan og matstovuvinnan vaksa mest
Størsti vøksturin var í flutnings- og goymsluvinnuni, har 118 fleiri fólk vóru í starvi enn í september í fjør.
Í gistingar- og matstovuvinnuni vóru 114 fleiri starvsfólk, meðan talið í almennari umsiting, verju og lógarásettum almannaveitingum vaks við 100 fólkum.
Men ikki allar vinnur hava framgongd.
Í landbúnaði, skógrøkt og fiskiveiðu vóru 107 færri starvsfólk enn fyri einum ári síðani. Sambært Hagstovuni stavar afturgongdin serliga frá alivinnuni.
Kvinnur arbeiða oftari hjá tí almenna
Tølini vísa eisini stóran mun á, hvar kvinnur og menn arbeiða.
57 prosent av øllum starvsfólkum arbeiða hjá privatum arbeiðsgevarum, meðan 43 prosent arbeiða hjá almennum arbeiðsgevarum, har eisini almenn partafeløg eru tald við.
Meirilutin av kvinnunum arbeiðir hjá almennum arbeiðsgevarum, meðan tað sama bert er galdandi fyri umleið fjórða hvønn mann.
Seinastu árini er talið av kvinnum hjá almennum arbeiðsgevarum vaksið serliga nógv. Samstundis eru støðugt fleiri menn komnir í starv hjá privatum arbeiðsgevarum.
