Fyri fyrstu ferð verður stóra norðurlendska Michelin-hátíðin hildin í Føroyum. Mánadagin 3. mai 2027 verður Norðurlandahúsið í Havn karmur um hátíðina, har bestu matstovurnar í Norðurlondum verða heiðraðar.
Tað boðar Michelin frá í tíðindaskrivi í dag, fríggjadagin 13. november.
Á hátíðini verða matstovur úr Danmark, Finnlandi, Íslandi, Noregi og Svøríki heiðraðar fyri síni avrik. Kokkar, umboð fyri matstovuvinnuna og fjølmiðlar úr øllum Norðurlondum fara at taka lut.
Norðurlandahúsið og Hotel Føroyar karmar um hátíðina
Sjálv Michelin-hátíðin verður í Norðurlandahúsinum, meðan veitslan aftaná verður á Hotel Føroyum.
Tiltakið verður skipað í samstarvi við Visit Faroe Islands, sum eisini fer at kunna gestirnar um føroyska matmentan og vísa teimum føroysku náttúruna.
Longu sunnukvøldið 2. mai verður eitt serligt tiltak fyri gestunum, har føroyskar rávørur og staðbundnar matsiðvenjur verða í miðdeplinum.
Michelin leggur í fráboðanini dent á, at føroyska matstovuvinnan er merkt av eini livandi matmentan, har staðbundnar rávørur, siðvenjur og nútímans matgerð ganga hond í hond.
Føroysk feløg stuðla stórhendingini
Fleiri føroyskir almennir myndugleikar og privatir samstarvsfelagar standa aftan fyri tiltakið.
Talan er um Umhvørvis- og vinnumálaráðið, Tórshavnar kommunu, Bakkafrost, Atlantic Airways, Christian í Grótinum, JFK og Krás.
Michelin boðar frá, at fleiri upplýsingar um hátíðina verða kunngjørdar seinni.
Við hátíðini fáa Føroyar høvi at vísa sína matmentan fram fyri nøkrum av fremstu kokkunum og matstovufólkunum í Norðurlondum.
