Danmark skal í framtíðini hava eina størri hernaðarliga nærveru í Føroyum.

Tað hevur danski verjumálaráðharrin Jeppe Bruus avtalað við landsstýrismannin í uttanríkis- og fiskivinnumálum, Bárður á Steig Nielsen, sambært Tv2.

– Vit eru eitt stórt ríki, og seinastu tíðina hava vit styrkt okkara nærveru allastaðni í Arktis og Norðuratlantshavi, sigur Jeppe Bruus

Simon Elbeck / Forsvaret

Í løtuni er tað ikki alment greitt út frá upplýsingunum frá TV 2 og Forsvarsministeriet, hvussu ein størri donsk hernaðarlig nærvera í Føroyum ítøkiliga skal skipast.

Tað, sum er nevnt, er fyrst og fremst ein politisk avtala um at styrkja samstarvið og nærveruna.

Møguligar leiðir, sum kunnu koma upp, eru:

Fleiri hernaðarvenjingar í Føroyum – millum annað við at víðka venjingarrammuna Arctic Endurance til eisini at fevna um Føroyar.

Fleiri vitjanir av donskum hernaðareindum – til dømis skip, flogfør og aðrar eindir hjá donsku verjuni.

Størri eftirlits- og vaktarvirksemi í Norðuratlantshavi, eitt nú innan sjóeftirlit og trygd.

Tættari samstarv við føroyskar myndugleikar um verjupolitisk mál.

Tað er tó ikki boðað frá, um Danmark ætlar at seta eina fasta hernaðardeild upp í Føroyum, ella byggja nýggjar hernaðarstøðir.

Í fyrstu atløgu snýr tað seg um at økja um virksemið og samstarvið í Føroyum sum partur av eini størri NATO- og danskari verju-nærveru í Arktis og Norðuratlantshavi.

Í morgin luttekur Jeppe Bruus í minningarhaldinum fyri 30-ára dagin fyri flogvanlukkuna við Vága Floghavn í 1996, har níggju fólk lótu lív.