Juni varð metheitur í Ny-Ålesund, sum er heimsins norðasta búpláss við heilársbúseting. Miðalhitin var 5,7 stig. Hetta er aðru ferð í fimm ár, at miðalhitin í juni hevur verið so høgur.

Tíggju av teimum 17 norsku hitametunum, sum vórðu sett ella javnað í juni, vórðu skrásett á Svalbarði.

– Tað er tíverri ikki óvæntað, at hitamet verða sett á Svalbarði, tí tað er í Arktis, at upphitingin gongur skjótast, sigur veðurlagsgranskarin Helga Therese Tilley Tajet.

Havísurin bráðnaði tíðliga

Arktis hitnar umleið tvær til fýra ferðir skjótari enn heimurin sum heild. Í Barentshavinum kann upphitingin vera upp í sjey ferðir skjótari enn heimsmiðalhitin.

Havísurin fór eisini tíðliga at bráðna í vár. Hin 10. juni var havísurin 11,18 milliónir ferkilometrar til víddar. Tað var fimtalægsta skrásetingin nakrantíð henda dagin.