Eftir ógvusliga eldin í gjár legði stóran part av bústaðarøkinum Krokstadelva í ruinur, er støðan nú batnað.

Sambært norskum myndugleikum er tamarhald komið á eldin í bústaðarøkinum, men sløkkiliðið arbeiðir framvegis við at basa teimum síðstu eldunum í skóginum og lendinum rundan um.

Nú er heilt greitt, at yvir 100 bústaðir eru brensir og meira enn 400 fólk hava mist heim sítt. Tey eru framvegis flutt burtur úr økinum.

Meira enn 100 sløkkiliðsfólk og fleiri sløkkityrlur hava verið við í umfatandi arbeiðinum. Regn og veikari vindur hava seinasta samdøgrið hjálpt sløkkiliðnum at fáa tamarhald á støðuni.

Hóast stóru oyðileggingarnar eru framvegis ongar fráboðanir um, at fólk eru deyð ella saknaði. Nakrir íbúgvar og sløkkiliðsfólk hava tó fingið lættari skaðar og roykeitran.

Løgreglan hevur sett kanningar í verk fyri at staðfesta, hví eldurin kyknaði. Samstundis arbeiða kommunalir myndugleikar við at finna fyribils bústaðir, og veita kreppuhjálp til tær mongu familjurnar, sum hava mist alt í eldinum.

Sløkkiliðið verður verandi í økinum, til allur vandi fyri, at eldurin kyknar aftur, er av.