Kommunan sigur, at arbeiðið skal tryggja eina sterkari og meira samanhangandi býar- og bygdamenning. Samstundis skal politikkurin verja staðbundnan samleika, søgu og arkitektonisk virði í allari kommununi.
Borgarar skulu hoyrast
Ein partur av arbeiðinum verður borgaraluttøka. Kommunan hevur tí sett eina talgilda spurnakanning í verk, har borgarar kunnu siga sína hugsan um arbeiðið.
Arkitekturpolitikkurin skal fevna um alla kommununa og verður eftir ætlan dagførdur fimta hvørt ár ella eftir tørvi.
Greiðari karmar fyri bygging
Kommunan vísir eisini á, at politikkurin skal geva borgarum, arbeiðstakarum og umsiting greiðari karmar í sambandi við verkætlanir og politiskar raðfestingar.
Dentur verður lagdur á bæði býarskipan, dygd og sambandið millum bygging og náttúru.
Arbeiðið verður knýtt at fleiri stórum verkætlanum og heildarætlanum í høvuðsstaðnum. Harímillum eru ætlanir fyri Eystara Havnarøki, miðbýin og Stórutjørn.
